ශ්‍රී ලංකා – නවසීලන්ත පුහුණු ටෙස්ට් තරගය ජය පැරදුමෙන් තොරව අවසන්

සංචාරක ශ්‍රී ලංකා කණ්ඩායම සහ නවසීලන්ත ක්‍රිකට් සභාපතිවරයාගේ කණ්ඩායම අතර තුන්දින පුහුණු ක්‍රිකට් තරගය අද ජය පරාජයෙන් තොරව අවසන් විය.

ක්වීන්ස්ටවුන්හිදී පැවති තරගයේ පළමුවෙන් පන්දුවට පහරදුන් ශ්‍රී ලංකා කණ්ඩායම සියලු දෙනා දැවී ලකුණු 193ක් රැස් කළේය.

ආරම්භක පිතිකරු දිමුත් කරුණාරත්න ලකුණු 93ක් ලබා ගත්තේය.

නවසීලන්ත ක්‍රිකට් සභාපතිවරයාගේ කණ්ඩායම කඩුලු 8කට ලකුණු 399ක් රැස් කරගෙන සිටියදී සිය පළමු ඉනිම අත්හිටුවනු ලැබිණි.

භාරත් පොප්ලි ලකුණු 79ක් රැස් කළ අතර, බෙන් ස්මිත් ලකුණු 81ක් ලබා ගැනීමට සමත් විය.

ශෝන් හික්ස් නොදැවී ලකුණු 79ක් රැස් කළේය.

දුෂ්මන්ත චමීර ලකුණු 57ට කඩුලු 4ක් ලබා ගත්තේය.

අද තරගය අවසන් වන විට සිය දෙවැනි ඉනිම ක්‍රීඩා කරන ශ්‍රී ලංකා කණ්ඩායමට කඩුලු 6කට ලකුණු 226ක් රැස් කරගෙන සිටියේය.

උදාර ජයසුන්දර ලකුණු 63ක් රැස් කළ අතර, කිතුරුවන් විතානගේ ලබාගත් ලකුණු ගණන 61කි.

නායක ඇන්ජෙලෝ මැතිව්ස් නොදැවී ලකුණු 54ක් ලබා ගත්තේය.

දෙරට අතර පළමු ටෙස්ට් ක්‍රිකට් තරගය ලබන 10 වන දා ආරම්භවීමට නියමිත ය.